DIAGNOSI-IRUDIKO ETA MEDIKUNTZA NUKLEARREKO GOI-MAILAKO TEKNIKARIA

Sartzeko baldintzak:

Goi-mailako ziklo edo moduluetara sartzeko, honako baldintza hauetako bat bete behar da:
• Hezkuntzari buruzko maiatzaren 3ko 2/2006 Lege Organikoan ezarritako batxiler-titulua izatea.
• Lanbide Heziketako Teknikari edo Goi Teknikari titulua izatea.
• Batxilergoko irakasgai guztiak gainditu izana egiaztatzen duen ziurtagiria.
• Goi-mailako heziketa-zikloetan sartzeko proba gainditu izana, ziklo horren lanbide-familiari dagokion aukera baten bidez.
• Hezkuntza Sistemaren Antolamendu Orokorrari buruzko urriaren 3ko 1/1990 Lege Organikoan ezarritako batxiler-titulua izatea.
• Lehengo Batxilergo Bateratu Balioanizduneko (BBB) ikasi eta gero emandako batxiler-titulua izatea. • Teknikari espezialista titulua izatea.
• Unibertsitate-titulua izatea.
• Unibertsitatera Bideratzeko Ikasturtea (UBI) edo unibertsitate-aurrekoa gainditu izana.
• Unibertsitatean sartzeko 25 urtetik gorakoentzako sarrera-proba gainditu izana.
• Batxilergo Esperimentaleko edozein modalitatetan 2. kurtsoa gainditu izana.
• Atzerriko ikasketak lehenago zerrendatutako tituluren batekin homologatzeko egiaztagiria.

Ikasketaren iraupena:

2.000 ordu

Zer ikasiko dut? Zer egingo dut?

Profesional hau gai izango da:
• Teknikariaren lan-eremua antolatzeko eta kudeatzeko, prozedura normalizatuen arabera eta izakinak biltegiratzeko eta kontrolatzeko teknikak aplikatuta.
• Irudi normalak eta patologikoak oinarrizko mailan bereizteko, irizpide anatomikoak aplikatuta.
• Tresneriaren funtzionamendua egiaztatzeko, kalitate- eta segurtasun-prozedurak aplikatuta.
• Lortutako irudi medikoen kalitatea egiaztatzeko, egokitasun-irizpideei eta prozesaketaren kalitate-kontrolekoei jarraiki.
• Irudi medikoak lortzeko, X izpietako, erresonantzia magnetikoko eta medikuntza nuklearreko tresneria erabilita, eta ekografiak egiten eta/edo unitatean erabiltzen diren edo etorkizunean sartuko diren beste teknika batzuk aplikatzen laguntzeko.
• Pazientearen erosotasuna eta segurtasuna ziurtatzeko, unitateko protokoloen arabera.
• Irudi bidez diagnostikatzeko probak edo tratamenduak egiteko erradiofarmakoak segurtasun-baldintzetan lortzeko.
• Diagnosi-teknika analitikoak egiteko, erradioimmunoanalisiko metodoak erabilita.
• Erradiologia-babeseko prozedurak aplikatzeko, erradiazio ionizatzaileen ondorio biologikoak prebenitzeko ezarritako protokoloen arabera.

Irakaskuntza hauek laneko arriskuen prebentzioko oinarrizko jarduerak gauzatzeko beharrezko ezagupenak hartzen dituzte barnean.

Nire ikasketak amaitzean, zer egin dezaket?

Honako lanbide hauetako bat izan dezakezu:
• Osasun-sektore publikoan eta pribatuan lan egin, erradiodiagnostikoko eta medikuntza nuklearreko unitateetan, ikerketa-zentroetan eta auzitegiko institutu anatomikoetan edo lege-medikuntzakoetan, baita albaitaritza-zentroetan eta animalia-esperimentazioko zentroetan, eta elektromedikuntzako aplikazioetako ospitaleko produktu, farmazia-produktu eta produktu teknikoen merkataritza-ordezkaritzetan ere.
Profesional honek dagokion mediku espezialistaren eta instalazioko gainbegiratzailearen ikuskaritzapean egingo du bere lana, instalazio erradioaktiboen operadoretzat jotzen duen Segurtasun Nuklearreko Kontseiluak (CSN) emandako egiaztagiriarekin. Estatuko osasun-administrazioak arautzen du bere lanbide-jarduera.

Ikasten jarrai dezakezu, eta ikasketa hauek egin:
• Lanbide-espezializazioko ikastaroekin.
• Goi-mailako lanbide-heziketako beste ziklo bat, indarrean dagoen araudiaren araberako lanbide-moduluen arteko baliozkotzeak ezarrita.
• Unibertsitate-ikasketak, indarrean dagoen araudiaren araberako baliozkotzeak ezarrita.

Zer-nolako lan-irtenbideak izango ditut?

• Diagnosi-irudiko goi-mailako teknikaria.
• Erradiodiagnostikoko teknikari espezialista.
• Medikuntza nuklearreko teknikari espezialista.
• Erradioelektrologia medikoko tresneriako langile teknikoak.
• Erradiologia-babeseko langile teknikoak.
• Ikerketako eta esperimentazioko erradiologiako langile teknikoak.
• Ospitale- eta farmazia-produktuen merkataritza-ordezkaria.

Zer lanbide araututara sar daiteke titulazio honekin?

• Diagnosi-irudiko eta medikuntza nuklearreko goi-mailako teknikaria osasun-lanbideak antolatzeko legearen arabera araututako lanbidea da.
• X izpien instalazioen operadorea.
• Medikuntza nuklearreko operadorearen lizentzia.

Prestakuntza-plana:

Hauek dira heziketa-ziklo honetako lanbide-moduluak:
• Pazientearen arreta. (132 o.)
• Oinarri fisikoak eta ekipoak. (198 o.)
• Irudi bidezko anatomia. (231 o.)
• Babes erradiologikoa. (132 o.)
• Erradiologia sinpleko teknikak. (165 o.)
• Erradiologia bereziko teknikak. (60 o.)
• Ordenagailu bidezko tomografia- eta ekografia-teknikak. (105 o.)
• Erresonantzia magnetiko bidezko irudi-teknikak. (90 o.)
• Medikuntza nuklearreko irudi-teknikak. (75 o.)
• Erradiofarmaziako teknikak. (60 o.)
• Diagnosi-irudiko eta medikuntza nuklearreko proiektua. (50 o.)
• Ingeles teknikoa. (33 o.)
• Laneko prestakuntza eta orientabidea. (99 o.)
• Enpresa eta ekimen sortzailea. (60 o.)
• Lantokiko prestakuntza. 510 o.)